اللعنة ما كانتشي الحجر،
الوهم
كان هو العقاب .
وهموك بإن الحجر
طالع بيجري وراك
ف حين ما كان الحجر
موهوم
كده زيك !
لا كان شايفك
ولا عن قصد بيطاردك .
ده كان شبهك
سيزيف تاني
بيلف نفس الدايرة
ويعاني
من التكرار !
مساحة فاضية
مساحة فاضية
نلتقي فيها
أقُبـَلك وتقُبلني
على عِلات تاريخ
لازم ييجي معانا كل ميعاد!
وليل مفروش على السكة.
ولفتارين واقفة ع الجانبين.
مساحة فاضية
تسمحلك وتسمحلي
بحبة صمت
حبة سكون
يهدينا لمعاني السكن،
لطريق وطن
يساع غلطنا وضحكنا
وما يزعلش
لو نكتب على حطانه
إهداء خاص لأوجاعنا
"للذكرى الهباب "، "للي كان حاضر وغاب"
" للوركا، وعرس الدم، أسباني وفلسطيني" .
مساحة فاضية
ع الشجر لطير واحد
شكله شوية غريب عن المألوف
وآخر الليل
بيحصل إن أحيانا
بيتعب قلبه م الطيران،
ويحتاج للسكن
ف مكان قريب منك
يحبك فيه على قد ما هو قادر
يخلص روحه م الأحزان .. ويفرح بيك.
مساحة فاضية للشتا
ييجي كمان مرة.
تفتكر نقدر نفضي م السنة مدة.
ونختار م الزمن لحظة
نراهن فيها بوجودنا
على موسم مطر
ما عدّاش من سنين
على حد ؟!.
