من طرف 
عربة في المترو
تميل السيدة البدينة على كتف جارتها في المقعد تلك الفتاة التي تحمل جريدة صغيرة.. تقرأ معها الأخبار قبل أن تقول:
والله يا اخواتي أنا ما عارفة بس هيفاء إيه دي اللي يتكلّف فرحها كام مليون جنيه.. على إيه؟.. ما البنات على قفا من يشيل!
يتمتم شاب يقف إلى جوارهما في صوت شبه مسموع: طبعاً من ناحية القفا.. ما فيش أكتر منه!
تضحك الفتاة، وتنظر له السيدة في غضب.. وهي تقول: بتقول حاجة حضرتك؟
الشاب: أبداً.. أبداً.. باتّفق معاكِ في الرأي طبعاً.. دي فراغة عين.. وبعدين جوز هيفاء رجل أعمال مصري يتجوز لبنانية ليه؟!!.. وهو فيه أحلى ولا أجمل ولا "أسمن" من المصري!!
تضحك السيدة وتقول: على قولك.. بس مين بقى عنده نظر!
تشاركهما الفتاة الحديث قائلة: على فكرة الجورنال بيقول إن فيه عضوة في مجلس محلي 6 أكتوبر طالبت بإصدار قرار جمهوري يمنع زواج المصريين من الأجانب.
السيدة: أيوه كده.. أهي دي ست جدعة وبنت بلد بصحيح!
الفتاة: وبتقول إن أسبابها في كده هو أن جواز هيفاء لرجل الأعمال المصري أبوهشيمة اتصرف فيه فلوس كتير كان ممكن تجوّز ييجي ألف شاب مصري زيه.. وكمان لأن الجواز من أجنبيات بيزوّد نسبة العنوسة في مصر.
السيدة: إييييييييه.. هتقولي ليّ على العنوسة.. قدامك أنا أهو.. داخلة على الأربعين وما فيش إحساس خالص!
الشاب: بس ده اسمه "هجص" ولا مؤاخذة.. مع كامل احترامي للمنتج المصري يعني.. بس والله القلب وما يريد: تايواني.. تايلاندي.. شامي.. فرنساوي.. بلدي.. براحته!
السيدة: هو إيه اللي شامي وفرنساوي وبلدي.. إنت حسستنا إنك عاوز تتجوز من مخبز!
الشاب: يا مدام.. إحم.. يا آنسة.. فعلاً الموضوع مستفز.. هو كل حاجة نطلّع لها قرار؟.. ثم هو كام واحد مصري يعني بيتجوّز أجنبية؟
الفتاة: ماتنساش إن فيه بنات مصريات بيتجوّزوا من أجانب علشان الفلوس؟
الشاب: والله ده اختيارهم وظروفهم حتى لو كان تصرف غلط.. ثم إننا متخصصون في اللف والدوران على القوانين.. هيطلع قانون يمنع الجواز من الأجانب من هنا هتلاقي ألف وسيلة تانية وقانونية مية في المية تخلي الجواز من الأجانب ده "سبوبة" كبيرة!
السيدة وقد قامت من مقعدها في انفعال: على فكرة إنت مش وطني وبدأت أتنرفز منك!
يتوقّف المترو في هذه اللحظة فيقفز الشاب فور أن تنفتح الأبواب وهو يقول ضاحكاً: وطني بقى ولا معارضة.. بعد إذنك!
الخبر صحيح فعلاً مش كلام في المترو!
إحدى عضوات مجلس محلي 6 أكتوبر تقدّمت بطلب لرئيس المجلس تطلب منه أن يُخاطب رئيس الجمهورية لإصدار قرار جمهوري يحظر الزواج من الأجانب إلا بموافقة من رئيس الجمهورية نفسه.
مبرراتها في هذا الرأي كان البذخ في حفل زفاف المغنية اللبنانية الشهيرة "هيفاء وهبي" على زوجها رجل الأعمال المصري "أحمد أبو هشيمة" الذي تُقيم عائلته في محافظة أكتوبر.
ورأت عضو المجلس المحلي أن الملايين التي صُرِفت على حفل الزفاف الأسطوري -قيل إنه تكلّف 9 ملايين دولار- كان سيستفيد منها العاطلون وراغبو الزواج في محافظة أكتوبر وغيرها..
رغم أن منع الجواز من الأجانب مالوش علاقة ببذخ الإنفاق في الأفراح..
لأننا بنسمع ونشوف ونقرأ عن أفراح مصرية مية في المية بيتصرف فيها ملايين..
لكن نفس السيدة كان عندها سبب تاني بيقول إن الزواج من الأجانب -في رأيها- يُزيد من نسبة العنوسة في مصر و.. "الحكاية مش ناقصة أصلاً"!
وأنت بقى.. إزاي الحال؟..
ما رأيك؟؟..
هل توافق فعلاً على إصدار قرار أو سن قانون يمنع زواج المصريين -سواء كانوا رجالاً أو نساءً- من الأجانب؟.. وإن اللي عاوز يتجوّز من أي أجنبي لازم يعمل ده بقرار جمهوري؟..
موافق فعلاً؟..
طب إيه أسبابك في كده؟..
أم إنك شايف أن هذا قرار لا محل له من الإعراب؟!..
وأنه لا يصح أن نضع ضوابط قانونية على ما بين القلوب؟!..
ومين عالم الخير فين.. في المصري ولا في الأجنبي!..
